هل الثقة بالنفس فطرية أم مكتسبة؟
هل الثقة بالنفس حاجة بنِتولد بيها؟ ولا دي حاجة إحنا بنكتسبها مع الوقت ومع المواقف؟
دي حاجة إحنا بنكتسبها مع الوقت ومع المواقف؛ الثقة دي مش عضو أو جين معين في جسمنا. برافو عليك! الثقة بالنفس دي حاجة إحنا بنكتسبها زي كل الصفات اللي في الدنيا:
الكرم صفة مكتسبة.
البخل صفة مكتسبة.
الاحترام صفة مكتسبة.
قلة الأدب برضه صفة مكتسبة.
فطالما إن الثقة بالنفس هي صفة إحنا بنكتسبها ومش مولودين بيها، يبقى اهدى، واطمن، وقول الحمد لله؛ الموضوع طلع ليه حل إحنا نقدر نعمله. دي مش -لا قدر الله يعني- عيب خلقي فيك أو إعاقة في جسمك، لا، دي حاجة أنت تقدر تكتسبها، بس الفكرة إنك تعرف إزاي تكتسبها.
المفهوم الخاطئ عن الثقة بالنفس
أول حاجة: هو إيه أصلاً تعريفك للثقة بالنفس؟
لازم تسأل نفسك السؤال ده قبل ما تبدأ تحل؛ لأن شباب كتير بيبقى واقع في فخ غلط تماماً. شباب كتير كتير بيكونوا فاكرين إن حتة الخناقات والبلطجة هي نوع من أنواع الثقة بالنفس، أو إني أتنمر على حد، أو إني أكون مغرور ومتعالي على الناس! كل ده طبعاً غلط تماماً، بل بالعكس.
أنا عاوزك تبروز الجملة دي:
"الشخص اللي طول الوقت بيحاول إنه يقلل من الناس ويهز ثقتهم في نفسهم، هو في الحقيقة شخص غير واثق من نفسه، وبيعمل ده علشان يداري بس على قلة ثقته بنفسه."
هو هنا بيطبق المبدأ اللي بيقولوا عليه "Fake it till you make it" (زيّفها لحد ما تتقنها)، بس هو واخدها بالطريقة السلبية. يعني أنا أصلاً فكرة "Fake it till you make it" -اللي هو اعمل نفسك واثق من نفسك لحد ما فعلاً تصدق إنك واثق من نفسك- أنا عندي عليها اعتراض وهقول لكم ليه قدام. المهم بقى، الثقة بالنفس مش الكلام اللي إحنا قلنا عليه ده خالص.
التعريف الحقيقي للثقة بالنفس
طب إيه هي بقى الثقة بالنفس؟ أنا عاوزك بقى تركز معايا.
الثقة بالنفس بكل اختصار: هي القدرة على التغيير في الواقع بتاعك، عن طريق الاستفادة بكل أدواتك، وتحديد نتيجة تكون متوازية مع توقعاتك من الأول.
يعني إيه الكلام ده؟
يعني تغير في الواقع اللي أنت بتعيشه، سواء شغل، أو دراسة، أو حالة نفسية، أو أي حاجة في الدنيا عموماً، عن طريق إنك تتعلم إزاي تستخدم أدواتك اللي ربنا رزقك بيها وتستفيد منها أقصى استفادة. ومش شرط الأدوات دي تكون حاجة ملموسة؛ ممكن مثلاً الأدوات دي تكون حاجة زى "الصبر".
اصبر على نفسك وأنت بتغلط علشان المرة الجاية تعمل الصح. طب لو معملتش الصح المرة اللي جاية؟ تعمله اللي بعدها، ما هو أصلاً أنت موركش حاجة غير إنك هتعمل الصح!
طب بقى، لو بعد ما ربنا يكرمك وتعرف تشوف أدواتك وتستخدمها صح، تبدأ إنك تعمل بيها أقصى تغيير في الواقع بتاعك، ويكون التغيير ده متماشي مع توقعاتك اللي أنت أصلاً حاططها من الأول. فلازم تبقى توقعاتك محطوطة بناءً على الأدوات اللي ربنا مديهالك في الوقت الحالي؛ والله جاءت أعلى من توقعاتك فده كرم من ربنا، طب جاءت أقل؟ الحمد لله، وبرضه كرم من ربنا.
علشان نحل المشكلة، لازم نعرف الأول: إيه هو سبب المشكلة
